Ikus-entzunezkoen 50/50 Berdintasunerako Lurralde arteko 2025erako Lantaldea (GTI Grupo de Trabajo Interterritorial de Igualdad en el Audiovisual 50/50 para 2025) osatzen duten erakunde feminista guztiak berriro elkartuko dira Donostia Zinemaldian, eta indarrak batuko dituzte programa kolektibo batean, ikus-entzunezkoen sektorean berdintasunaren, aniztasunaren eta indarkeriak desagerraraztearen aldeko esparru komun bat sendotze aldera.

Zinemaldiaren agendak jardunaldiak, mahai-inguruak eta ekintza kolektiboak barne hartuko ditu. Programa bi gune handitan antolatuko da: batetik, irailaren 22an (9:00-18:00), Tabakalerako Z aretoan Egungo ikus-entzunezko industriari buruzko diagnostiko feministak jardunaldia egingo da, jada iragarri den bezala, Zinemaldiko Pentsamendua eta Eztabaida arloko Hizketaldien programaren parte gisa; eta, bestetik, Gure ahotsak ekintza kolektiboa irailaren 23an izango da, Kursaaleko prentsa-aretoan (12:30-13: 30).

Gure Ahotsak: Indarkeria Sexualen Aurkako Ekintza Kolektiboa izenburuarekin, hilaren 23ko jardunaldian sektoreko elkarte feministak eta profesionalak bilduko dira, eta erreferentziazko hiru dokumentu aurkeztuko dituzte: horietako bat, (H)emen taldearen eta Euskal Aktoreen Batasunaren (EAB) protokoloa eratzeko ikerlanean bildutako datu berri-berriekin; beste bat, Después del silencioren –zinemaren eta ikus-entzunezkoen sektoreko sexu-indarkeriari buruz CIMAk egindako lehen estatu-txostenaren– aurkikuntzekin; eta azkenekoa, ¡Corten! testua (ikus-entzunezko industrian eta zinema-ekitaldietan sexu-jazarpena eta -indarkeriak prebenitzeko jardunbide egokien eskuliburua), AAMMAk garatua.

Gainera, dokumentuetan jasotako eta sexu-indarkeriekin lotutako kontakizunen zatiak irakurriko dituzte sektoreko emakumeek (ekoizleak, zuzendariak, aktoreak, konpositoreak, kazetariak, etab.) kolektiboki. Helburua halako emakumeei ahotsa ematea da, haien esperientzien oihartzuna biderkatzea eta ikus-entzunezko industria osatzen duten ahotsen aniztasunetik diskurtso kolektibo bat eratzea.

Programa honekin, GTI sektoreko erreferente kolektibo gisa finkatu da, eta ahots bateratu bat eraman du Donostiara, industria eraldatzeko, aukera-berdintasuna bermatzeko, aniztasuna indartzeko eta sexu-indarkeriei irmoki aurre egiteko premia larria agerian uzten duen ahots bat, hain justu. Kooperazio-ariketa bat da, eta aukera ematen du ondorioak Zinemaldiaren nazioarteko esparruan proiektatzeko eta profesionalekin, erakundeekin eta ikus-entzuleekin eztabaida zabal bat abiarazteko, ikus-entzunezko industria aniztasun eta berdintasun handiagokoa eta indarkeriarik gabea izan dadin lortzeko bidean aurrera egitea izanik jomuga komuna.

GTI-ri buruz

Ikus-entzunezkoen Berdintasunerako Lurralde arteko Lantaldea (GTI) Espainiako lurralde osoko ikus-entzunezkoen elkarte feminista guztiak biltzen dituen sarea da: AAMMA (Andaluzia), AMMA (Murtzia), CIMA (Zinemako eta Ikus-entzunezko Hedabideetako Emakumeen Elkartea), Dona i Cinema (Valentzia), Dones Visuals (Katalunia), Hemen (Euskal Herria) eta MIA (Animazio-zinemako Industriako Emakumeen Elkartea). Bere helburu nagusia modu kolektiboan lan egitea da, zinemaren eta ikus-entzunezkoen sektorean benetako berdintasuna bultzatzeko.