Donostia Zinemaldiaren 74. edizioko Hizketaldien programak Ira Sachs, Beth de Araújo, Benjamín Naishtat, Naëmi Ada eta Jordan Firstman zinemagileak bilduko ditu, zinema sortzeko prozesu eta zinema egiteko eta pentsatzeko modu askotarikoak jorratzeko. Topaketetan gai hauek ere jorratuko dira, besteak beste: ikus-entzunezkoetan arrazakeriaren aurkako ikuspegiak txertatzea, narratiba- eta egiletza-modu berriak, sorkuntza-egonaldiak eta nazioarteko-laborategiak, zinemaren botere eraldatzailea eta arte-diseinua eta -zuzendaritza. Halaber, familia-harremanak kontatzeko modu berriak, gorputza narrazio-gailu gisa eta ikus-entzuleen, algoritmoen eta ikus-entzunezko banaketaren erronkak ere aztertuko dira.

Hizketaldiak Pentsamendua eta Eztabaida arloak antolatutako atal bat da. Hizketaldietan, Donostia Zinemaldiak topaketarako, ezagutza sortzeko eta transmititzeko gune gisa duen izaera nabarmentzen du, eta, horrez gain, bere burua galdekatzen du, bai eta etorkizunean panorama zinematografiko aldakor baten aurrean erantzunak eskaintzen saiatu ere.

Hizketaldiak

Edizio honetako lehen Hizketaldia hilaren 19an izango da, Tabakalerako 1 aretoan (lehen Z zeritzona) eta Besteen begian habea: kritikaren matxinada Cabezas Cortadasen estreinaldiaren aurrean izenburua eramango du. FlixOléko programazio- eta marketing-zuzendari Miguel Lópezek zuzendutako solasaldian, Javier Mosqueda filmen zaharberritzean aditua 1970eko Zinemaldiko Glauber Rocharen Cabezas cortadas lanaren estreinaldi nahasiari buruz ariko da; La Vanguardia egunkarian argitaratutako kritika batek Espainiako kultura zinematografikoko izen gazteen erantzun publikoa jaso zuen. Topaketak begirada kritikoaren eboluzioaren inguruko hausnarketa egingo du eta pelikularen zaharberritze berriaren trailerra aurkeztuko du 4K-n.

Hilaren 20an (igandea), Postigo Express emango da Tabakalerako zinema-aretoan, Fernando Postigo argazki-kazetari donostiarraren ibilbidea erakusten duen film ertaina, hain justu ere; 70eko hamarkadatik 2000ko hamarkadaren hasierara arte, euskal gatazkaren errealitatea dokumentatu zuen Donostiako kaleetan Postigok kamera eskuan zuela. Filmaren emanaldiaren ondoren, Peter Decherney zuzendariak eta Postigok berak elkarrizketa bat izango dute argazki-kazetaritzak garai baten testigantza gisa duen eginkizunari buruz eta irudiaren, memoriaren eta gatazkaren arteko harremanari buruz.

Egun horretan bertan, Tabakalerako Zine eta Ikus-entzunezko laborategian Sorkuntzarekin batera: nazioarteko egoitzen eta laborategien panorama solasaldia hartuko du. Bertan izango dira Angelica Cantisani, Torino Film Labeko programen koordinatzailea; Vanja Kaludjercic, Rotterdamgo Zinema-jaialdiko zuzendaria; Andrea Queralt, zinema-ekoizlea eta FIDLab Marsellako koordinatzailea; eta Maialen Franco, Donostia Zinemaldiko prestakuntza-programen arduraduna eta topaketaren moderatzailea. Horrez gain, zinema munduko bi ahots berri izango dira mahai-inguruan: Irati Gorostidi Agirretxe eta Diego Céspedes. Haien ikuspegiek hausnarketa bateratua irekitzea ahalbidetuko dute.

Hizketaldien esparruan, GTIk —ikus-entzunezkoetan genero-berdintasunaren aldeko lurralde arteko lantaldeak, AAMMA, AMMA, CIMA, Dona i Cinema, Dones Visuals, (H)emen eta MIA erakunde feministez osatuak— eta RTVEko Berdintasun Behatokiak Kultura Ministerioak diruz laguntzen duen Nork du imajinatzeko eskubidea? Ikus-entzunezko feminista, antirrazista eta dekolonial baten alde izeneko jardunaldi bat egingo dute irailaren 21ean, industriari, prentsari eta publiko orokorrari zuzendutako mahai-inguruak eta ekintzak bilduko dituena, analisi kritiko bat egiteko, nola sektoreko emakume arrazializatuek eta migratzaileek pantailan duten irudikapenari buruz, hala zuzendari-lanetarako sarbidearen alorrean inposatzen dizkieten desberdinkeriei gagozkiela.

Testuinguru horretan, hilaren 21ean (astelehena), Ikus-entzunezkoetan arrazakeriaren aurkako ikuspegia eta ikuspegi dekoloniala txertatzeko praktika eta politika inspiratzaileak hizketaldia egingo da, Tabakalerako 1. Aretoan, ekoizpen kate osoan emakume migratzaile eta arrazializatuek jasaten dituzten oztopoak eta indarkeriak aztertzeko eta egiturazko desberdintasun hori iraultzeko proposamenak egiteko asmoz. Beatriz Mbula zinemagile eta aktoreak moderatuko du ekitaldia, eta Dagmary Olívar Graterol kultur kudeatzaile eta ikertzailearen, eta Wendy Espinal zinemagile eta kultur kudeatzailearen partaidetza izango du.

Jardunaldiaren programazioak Narratiba berriak iruditeria berrientzat / Kontakizuna eraldatzen duten emakumezko sortzaileak, zinemagileak eta egileak ere hartuko du. Eztabaida horretan, hainbat zinemagilek gogoeta egingo dute begiratzeko, kontatzeko eta (norbera) irudikatzeko modu berriak eraikitzeko aukeraz, eta zalantzan jarriko dute nork izan duen eta duen bizi garen mundua irudikatzeko eskubidea. Lucía G. Romero zuzendari, idazle eta gidoigileak gidatuko du hizketaldia eta Daysi Cruz Cid ekoizle exekutibo eta ikus-entzunezko aholkulariak, Eva Montoya gidoigileak, Xixi Sofia Yen Chen zinema-zuzendariak eta Herminia Loh musikari, aktore, soinu-laguntzaile eta txoferrak parte hartuko dute bertan.

2030 Euskadi Basque Country Agendak Zinemaldian izango dituen jardueren barruan, astelehenean Diego Lunarekin ere hitz egingo da (Lunak aurten Horizontes Latinosen aurkeztuko du bere lan berria zuzendari gisa: Ceniza en la boca / Ashes). Ambulante erakundearekin izandako esperientzian oinarrituta, aktore, zinemagile eta ekoizle mexikarrak zinemari buruz hitz egingo digu, zehazki, zinemak inguruari behatzeko eta ingurua eraldatzeko modu berriak zabaltzeko duen gaitasunari buruz. Ambulante Gael García Bernal eta Elena Fortesekin batera sortu zuen Lunak, eta dokumentala eraldaketa sozial eta kulturalerako baliabide gisa sustatzea du helburu. Noemi Cuetos ICEXeko Zinema Ataleko buruak moderatuko du hizketaldia.

Asteartean (hilaren 22a), Tabakalerako 1. Aretoak El género de la democraciaren —Cecilia Barrigak zuzendutako dokumentalaren— emanaldia hartuko du. Barrigaren dokumentalean, Espainia osoko 40 gaztek baino gehiagok bizitzea tokatu zaien sistema politiko eta sozialaz, etorkizun kolektiboko irrikez eta bete gabeko promesez hausnartzen dute. Emanaldia Gazteak, zinema, memoria eta demokrazia sailaren programazioaren barruan kokatzen da, Espainiak askatasunean 50 urte bete dituela ospatzeko ordezkaritzak bultzatua, eta amaieran solasaldi bat egingo da zuzendariarekin berarekin eta dokumentalean parte hartu duten gazteetako batzuekin.

Hilaren 23an (asteazkena) Euskadiko Arkitektura Institutua Fikzioa eraikitzen: Arte-diseinua eta -zuzendaritza zineman hizketaldiaren eszenatokia izango da. Antxón Gómez —zuzendari artistikoa, ekoizpen-diseinatzailea eta Pedro Almodóvarren ohiko kolaboratzailea— izango da topaketaren protagonista, eta Enric Pastor —MANERA aldizkariaren sortzaileetako bat eta argitalpen-zuzendaria—, berriz, moderatzailea. Zinemaldiaren eta Euskadiko Arkitektura Institutuaren arteko lankidetzatik sortutako hizketaldi honetan zinema-narratibari diseinuak egiten dion ekarpenari buruz hausnartuko dute Gómezek eta Pastorrek, bai eta filmaketarako objektu espezifikoak eta kokalekuak aukeratzeko arrazoibideari buruz ere. Institutoaren egoitzan, Santa Teresa komentuan, izango da hizketaldia.

Programazioko azken hizketaldia hilaren 26an izango da (larunbata), Tabakalerako zinema-aretoan, Beth de Araújorekin, Josephine —bere film berria, aurten Perlak saileko Publikoaren Saria irabazteko lehiatuko dena— eman ondoren. Zinemagile estatubatuarrak Publikoaren Saria eta Epaimahaiaren Sari Nagusia irabazi zituen Sundancen bere bigarren film luzearekin, Berlinaleko lehiaketa ofizialean parte hartzeaz gain.

Hizketaldiak: Nest

Nestek —Donostia Zinemaldiko zinema-ikasleen film laburren nazioarteko lehiaketak—Tabakalerako zinema-aretoan programatutako lau hizketaldi ere izango ditu programazioan.

Astelehenean (irailaren 21a), Ira Sachsek abiaraziko ditu topaketak Nesteko partehartzaileei zuzendutako hizketaldi pribatu batean. Aurten, zinemagile estatubatuarra, Zinemaldiko Epaimahai Ofizialaren buru izateaz gain, The Man I Love film luzea aurkeztuko du Perlak sailean, eta hizketaldiaren aurretik ere proiektatuko da filma. Sachs, The Delta (1996), Forty Shades of Blue (2005) eta Little Men (2016) obren zuzendaria, Cannesko lehiaketa ofizialean parte hartu ondoren iritsiko da Donostiara, eta zinemari buruzko begirada partekatuko du Nesteko ikasleekin, saileko ikasle ohi batek eta Jaume Claret Muxart zinemagileak —Elías Querejeta Zine Eskolako eta saileko ikasle ohi batek, hain justu ere— gidatutako topaketa batean.

Hurrengo egunean, Jordan Firstman idazle, ekoizle eta aktore estatubatuarrarekin solasaldia izango da. Canneseko Un Certain Regard sailetik pasa ondoren, Perlak sailean Club Kid bere lehenengo film luzea aurkeztuko du. Firstmanek Call Your Father (2016) edo Men Don’t Whisper (2017) –Sundancen proiektatua– bezalako film laburrak idatzi, zuzendu eta protagonizatu ditu, eta Search Party serieko gidoilaria izan da. Hizketaldian bere lehen filmari forma emateko aurre egin behar izan dien erronken eta hartu dituen erabakien inguruan hausnartuko du.

Hilaren 23ko (asteazkena) hizketaldiak Benjamín Naishtat izango du protagonista; aurten, gainera, bi aldiz hartuko du parte Zinemaldian argentinarrak; Glaxorekin Urrezko Maskorra lortzeko lehiatuko da, eta Zabaltegi-Tabakalera Saria lortzeko, María Alchérekin batera, Pedro en el país lanarekin. Zuzendari eta gidoilari buenosairestarraren —Rojo filmagatik (2018) Zilarrezko Maskorra irabazi zuenaren— partaidetza izango duen hizketaldia Glaxo filmaren proiekzioaren ondoren izango da.

Nesteko azkeneko hizketaldian Naëmi Ada ariko da solasean, Body of Glass —bere lehen lana, New Directors sailean lehiatuko dena—eman eta gero. Zuzendari alemaniarra lehen film luze hau sortzeko prozesuari buruz ariko da; bere debutaren atzeko sormen ibilbidea eta bere filmari forma eman zioten erabakiak lehen eskutik ezagutzeko topaketa bat izango da. Film laburrak eta lan esperimentalak zuzendu ondoren Deutsche Film- und Fernsehakademie Berlin-en (DFFB) graduazio lana da Body of Glass.

Hizketaldiak: Industria

Zinemaldiko Pentsamendua eta Eztabaida arloak, Industria sailarekin batera, sailei buruzko ohiko jardunaldia antolatu du larunbaterako (hilaren 19a), Tabakalerako 1. Aretoan. Aurten We are Family izena izango du, familia-harremanak gaur egun nola kontatzen diren eta halako istorioek iruditeria kolektiboan zer-nolako eragina duten arakatzea izanik jomuga. Hizketaldia Isabel Vázquez gidoilariak moderatuko du, eta Fran Araújo ekoizle exekutibo eta gidoigileak, Aina Clotet aktore, zuzendari, gidoigile eta ekoizleak eta Javier Ferreiro zuzendari eta gidoilariak hartuko dute parte.

Asteartean —hilaren 22an—, Gorputzetik kontatzea. Autobiografiak errealitatearen eta fikzioaren artean Iberoamerikako LGBTIAQ+ zineman hizketaldia hartuko du San Telmo Museoak. Zinemagileek kontakizunak eratzeko material autobiografikoetara eta bizipen pertsonaletara jotzeko izan ohi duten joeran, errealitatearen eta fikzioaren arteko tentsioetan eta gorputza kontatzeko baliabide bihurtzeko moduan sakonduko da. Topaketan Tiagx Vélez zinemagile, irakasle eta trabestia, Lluis Garau diziplina anitzeko artista eta Afioco Gnecco zuzendari eta gidoigilea –Made in Spain sailean Este cuerpo mío aurkeztuko duena– bilduko dira. Selva González ekoizl txiletarra ariko da hizketaldiko moderatzaile-lanetan.

Ikus-entzuleak, algoritmoak eta ikus-entzunezko banaketa izango da Zinemaldia & Technology ekimenaren —teknologia ikus-entzunezkoen sektorearekin lotzen duen arloaren— baitako hizketaldia. Ostegunean (hilaren 24a), Tabakalerako Prisman, Gloria Saló ekoizpen- eta eduki-aholkulariak, Fleur Dopheide The Searchers-eko marketin-arduradunak eta Victoria Cazalla YouTubeko telebista- eta zinema-aliantza estrategikoen arduradunak gai interesgarri bati buruz hitz egingo digute: industria ikus-entzule berriekin konektatzeko garatzen ari den estrategiei eta banaketa-eredu tradizionalek digitalizaziotik eratorritako fenomeno berriekin duten bizikidetzari buruz hitz egingo dute (AC Coppens izango da moderatzailea).

Hizketaldi horiez gain, Industria Departamentuak hainbat mintzaldi eta mahai-inguru antolatuko ditu Europako ikus-entzunezkoen orainaren eta etorkizunaren gakoen inguruan. Era berean, bosgarren urtez jarraian, Inbertitzaile Sortzaileen Topaketa (Spanish Screenings: Financing & Tech) antolatuko du departamentuak. Hitzaldien eta elkarrizketen saio honetan, ikus-entzunezko sektorearen joera eta eraldaketa nagusiak aztertuko dira, hasi Estatu Batuetako ekoizpenaren egoera berritik eta Europako merkatuaren erronka eta aukeretatik eta finantzaketa-, inbertsio- eta banaketa-formula berrietara arte.