Mike Leighek zuzendutako Tender Loving Care (Erresuma Batua) film luzeak Donostia Zinemaldiaren 74. edizioko Urrezko Maskorra irabazi du, Leighek berak idatzitako Gidoi onenaren Epaimahaiaren sariaz gain. Zinemagile britaniarraren filmak Kate O 'Flynn aktoreari emandako Interpretazio nagusi onenaren Zilarrezko Maskorra ere lortu du, Asta Kamma Augustekin ex aequo irabazitako saria, Markens grøde / Growth of the Soil (Norvegia-Danimarka-Alemania) filmean egindako paperagatik. Halaber, Hans Petter Molandek zuzendutako lan honek Argazki onenaren Epaimaiharen Saria irabazi du, Oskar Dahlsbakkeni emandakoa.

Epaimahaiaren Sari Berezia Ah Biaok zuzendutako Bian Jing / Border (Hong Kong-EEEU-Hego Korea) lanak irabazi du, eta honela deskribatu du lana epaimahaiak: "Film ausarta da, hala molde zinematografikoan, nola esplizitutasun sexualean, eta, ikuspegi sendo horri esker, munduko zineman ahots berri bikain bat agertu dela esan daiteke".

Zuzendari onenaren Zilarrezko Maskorra Amanda Kernellek irabazi du, Garrat du váimmu / Brace Your Heart (Suedia-Norvegia-Dinamarca-Islandia-Bulgaria) lanaren egileak. Javier Camarak, berriz, Taldeko interpretazio onenaren Zilarrezko Maskorra jaso du, 5 minutos más / 5 More Minutes (Espainia) filmean egindako lanagatik. Aktore espainiarrak irabazi zuen jada Zilarrezko Maskorra, Truman (2015) filmean berarekin lan egin zuen Ricardo Darín aktorearekin ex aequo.

Ira Sachs zinemagilea izan da Genki Kawamura zuzendari eta gidoigilearekin, Catherine Paillé gidoigilearekin, Alice Braga aktore eta produktorearekin, Patricia López Arnaiz antzezlearekin, Bill Skarsgimonrd aktorearekin eta Mike Goodridge ekoizlearekin batera palmaresa osatu duen epaimahai ofizialaren burua.

BESTE SARI OFIZIAL BATZUK

Body of Glass (Alemania-Frantzia) Naëmi Adaren lehen filmak Kutxabank-New Directors Saria lortu du. Sari horren epaimahaiak aipamen berezia egin dio Yoon Dan-biren  The World Before (Hego Korea-Japonia-Frantzia) filmari.

Horizontes Make & Mark Saria eta Gazteriaren DAMA Saria La ilusión de un verano sin fin / The Illusion of an Everlasting Summer (Argentina-AEB) filmak irabazi du, Alessandra Sanguinettiren estreinako lana, jada bere saileko (Cineasti del Presente) Urrezko Lehoinabarra eta opera prima onenaren sariak lortu zituena Locarnoko zinema-jaialdian. Aipamen berezia Moscas / Flies (Mexiko-Espainia) filmarentzat izan da. Fernando Eimbckek 2025ean WIP Latam Industria Saria irabazi zuen Donostian proiektu honekin, eta aurten Berlinalen lehiatu da.

Zabaltegi-Tabakalera Saria Teenage Sex and Death at Camp Miasma filmarentzat izan da, Jane Schoenbrunek Cannesko Zinemaldiko Un Certain Regarden egindako filma eta Queer Palm Sariaren irabazlea. Aipamen berezia izan du A veces me entra tristeza, otras veces rebelión / Sometimes Sadness, Sometimes Rebellion (Argentina-Espainia) film luzeak, María Apariciori Veneziako zinema-jaialdiko Giornate degli Autori sarietan Zuzendari onenaren saria eman ziona.

Maarij Reka (Film & Television Institute Art Indonesia Yogyakarta, Indonesia) zuzendariaren Dihapus dari peta / Erased from the Map (Indonesia) film laburrak Tabakalera Zine eta Ikus-entzunezko Laborategia-Nest Saria lortu du, eta aipamen berezia eman dio Júlia Coldwell Serra (ESCAC, Espainia) zuzendariaren Ningú borda / Nobody Barks (Nadie ladra) (Espainia) film labuirrari.

Jatorrizko Musika Onenaren SGAE Fundazioa Sari berria, Sail Ofizialean lehiatzen diren filmetako bati zuzendua, Amine Bouhafak irabazi du, Nicole Garciak zuzendutako 7h40 ce matin-là / Milo (Frantzia) partituraren egileak.

Burgundy (AEB) Michael Dweck eta Gregory Kershawren film luzeak, Veneziako Zinemaldiko Venice Open sailean estreinatuak, Culinary Zinema Saria jaso du, eta Txakun txakür (Frantzia-Espainia) film luzeak, Elsa Oliarj-Inèsek zuzendua, Euskal Zinemaren Irizar Saria.

Perlak saileko ikusleek aukeratzen duten Donostia Hiria Publikoaren saria La bola negra (Espainia-Frantzia) filmarentzat izan da, Javier Calvo eta Javier Ambrossiren filmarentzat, Cannesen Zuzendari onenaren saria irabazi zuena, Pawel Pawlikowskirekin ex aequo (Vaterland/Fatherland). Gainera, Europako Film onenaren Publikoaren saria NAZArentzat izan da (Yuval Abraham eta Rachel Szor), Venezian Epaimahaiaren Sari Berezia irabazi zuena.

Azkenik, Eusko Label Saria Esperantza (Espainia) eta Eskuak / Hands (Espainia) film laburrek jaso dute, Josu Ozaitak eta Mikel Urretabizkaiak, hurrenez hurren, lehen eta bigarren sariak eskuratu baitituzte. Gainera, gizarte-gaiei buruzko film laburren lehiaketari dagokionez, Javi Pradaren Prejuicios (Espainia) izan da Loteriak Saria jaso duen lehen lana, eta Lucía Saavedraren Headscarf (Espainia) bigarrena.